炒燶蘋果

炒燶蘋果
蘋果 iPhone 4終於炒燶!隨着蘋果官網自周日起大開中門供應 iPhone 4,炒家信心近兩日逐漸崩潰,出現「大時代」式恐慌性拋售。一部 16GB版本 iPhone 4行貨原價$4,988,上星期炒價約$5,200,呢兩日一度跌至$4,700,每部要蝕$288,全港頓時遍地唉瘋蟹民,長達九個月嘅全民喪炒期告終。
炒燶 iPhone 4周街蟹貨

圖: 炒燶蘋果

「好似世界末日咁,連床下底儲埋幾件貨都拎埋出嚟放,個價有乜可能唔冧?」旺角先達水貨商劉志剛形容,近兩日先達有大量炒燶唉瘋嘅蟹民散貨,佢間舖一日就收過千部機。八方在網上見到一張相片,有人抬一大箱 iPhone 4到先達脫手,目擊網民指鏡頭外其實仲有過百部機,據稱呢個蟹民每部$4,800元一口氣放售 260部,以每部蝕 200蚊計,咁就冇咗 5.2萬元。


圖: 炒燶蘋果
人人怕坐艇,唔少蟹民網上散貨,「你係咪要 iPhone 4?我 4,800賣畀你」。多個討論區都有人出讓全新 iPhone 4,平均價$4,800,要錢唔要機,坊間盛傳某「數字台」電訊商有 3萬部 iPhone 4存貨,可能係全港最巨「大閘蟹」。
今次 iPhone 4炒價崩圍,全因蘋果突然持續出貨。有蟹民指過去蘋果官網開售 iPhone 4,唔夠一個鐘頭就被訂爆,出貨期亦要兩星期以上,好多時仲被蘋果 cut單,所以通常一開賣就有咁多訂咁多。點知周日開始蘋果官網 iPhone 4長賣長有,炒家心知不妙想 cut單,蘋果卻已經送貨,結果即時扮蟹。